قبل 30 سنة تقريبًا ظهر شخص في جبال صعدة؛ قال للناس:
اسمعوا، أنا جدي النبي، ومعي تفسير خاص بالقرآن، وكل اللي تعلّمتوه في الدين من تفسير وأحاديث وفقه ووو من 1400 سنة مالكم منه؛ كله غلط ولا ينفع بريال. ومالكم من كل علماء الدين اللي كتبوا آلاف الكتب، حتى الصحابة مالكم منهم؛ محد فهم القرآن مثلي أنا. وقد عملت لكم ملازم فيها كووول شيء؛ امشوا عليها وبتدخلوا الجنة على ضمانتي.
واسمعوا... العالم كله بايحاربني علشان هذه الملازم؛ لأن فيها التفسير الصحيح للقرآن اللي بايخليكم تحكموا العالم لو مشيتوا بعدي. ولا تنسوا الصرخة؛ كمان هذه بيقاتلوكم عليها لأنها تهز النظام العالمي وتفكفك أبوه.
طبعًا حصل له خجف صدّقوا كلامه، وأصبح زعيم جماعة ورمز مقدّس، وسمّوه "قرين القرآن". والخجفان حقه شلّوا البلاد كلها ودخّلوها في حرب مع الإقليم والعالم من 22 سنة ولليوم. ومحد يقدر يقنعهم إن اللي يعملوه غلط، وإنهم يدمروا أنفسهم وأهلهم وبلادهم، وإن صاحبهم هو الأول واحد جاهل ولا فاهم شيء بالدين.
تقلهم: الله قال في القرآن كذا. يقولوا لك: لااااع لا.. سيدي زعيط قال في الملازم كذا، وهو الوحيد اللي فهم القرآن وفسّره.
يا جماعة، الرسول قال كذا. يقولوا لك: لااااع لا.. سيدي زعيط قال في الملازم كذا.
يا خبرة، الصحابة قالوا كذا. يقولوا لك: لااااع لا.. سيدي زعيط قال في الملازم كذا.
طيب يا جن، في معانا دولة ودستور وقانون وأحزاب ونخبة وديمقراطية ووو. يقولوا لك: لااااع لا.. سيدي زعيط قال في الملازم كذا.
ملى دمرتم البلاد والعباد، وسيدكم أول واحد قرح رأسه بسبب الفكر حقه، فكركم ومشروعكم غلط في غلط. يقولوا لك: لااااع، هو استهدفوه علشان الفكر القرآني حقه، علشان المسيرة القرآنية ما تنتشر بين الناس كلها وتحكم العالم.
وهذا نفس الخبر مع نظام الطيبات وصاحبه ضياء العوضي.
من صفحة الكاتب على الفيسبوك
