فهمي مارش
لولا انقطاع الكهرباء.. لا تسوقوا عدن بسوادية
جلست في عدن اسبوعا، ما في من قال لي من انت ولا من أين أنت، ولم أر مسلحين في عدن غير مرتين مرة بعد صلاة الفجر لثلاثة عسكر لابسين ميري وكأنهم خارجين من معسكرهم، ومرة في مطعم سياحي في شارع التسعين شخص شكله مسؤول وبعده ثلاثة مرافقين..
غيرهم والله ما شفت مسلحا داخل المدينة.
النقاط العسكرية داخل عدن نقطة واحدة هي عند ساحل أبين فيها جنديان ولا يسالا احدا عن شيء.
الموقف الوحيد الذي شفته مستفز في عدن، وأنا راجع من المخا والباص مليان ركاب من عدن كلهم عسكر في المخا
وفي النقطة مدخل عدن اوقفنا العسكري وطلب من صاحب الباص 500 ريال.
وقال أي باص يجي من المخا ضروري يدفع 500 ريال رفض السواق وتضامن معه الركاب والركاب قالوا احنا السبب قلنا يرحل، ايه والله قالو كذه للعسكري.
وانا مفصع جنب السواق ضرب العرق العفاشي عندي وقلت له خذ هذي ال 500 مني وسكهنا.
غير هذا والله انك تعيش في عدن لا من يقول لك من انت ولا من أين أنت.
لم افكر مرة في حياتي اننا اسكن في عدن غير هذي المرة....
المشكلة الوحيدة في عدن هي الحر وانقطاع الكهرباء فقط.
وأفضل موقف شفته وانا بعد صلاة الجمعة في شارع التسعين بين الشمس منتظر تاكسي وقف جنبي صالون اخر موديل، ويقول لي اتفضل يا اخي.. اطلع، أين تبغى... قلت له الشيخ. ووصلني للشيخ عثمان. صاحب الصالون رجال من أبناء يافع...
مش كذه وبس، اقسم بالله اننا في التاكسي وفي الساحل وفي أي مكان اتكلم مع الجنوبيين احانبهم بالسياسة محانبة....
منهم من يشكر ومنهم من يشتم...
لا تسوقوا عدن بسوادية. عدن فيها الطيب والبطال وابن الناس وابن السوق مثلها مثل تعز وصنعاء وغيرها من المدن،
أبناء الجنوب طيبون بسجيتهم والسياسة هي الملعونة في اي مكان.
*من صفحته بالفيس بوك
